24間必去弘大/明洞/江南Personal Colour中心推薦

Hello，大家好，我哋係由韓國人每日提供最新韓國旅行資訊嘅Creatrip。

韓國最近超興做Personal Colour Test（個人色彩診斷），大家應該都聽唔少！不過韓國有好多個人色彩診斷中心都冇提供外國語言服務，要預約都好難，甚至可能要自己請翻譯... 

而小編團隊由幾年前開始就喺韓國幫大家發掘Personal Colour中心，今次推薦俾大家嘅呢二十幾間首爾個人色彩中心全部都係小編們親身去過超過體驗，亦都有提供中文、英文翻譯服務、服務夠高質嘅店鋪，每間仲有小編真實探訪記，打算嚟韓國體驗嘅朋友記住save低參考啦！

香港人最愛韓國Personal Colour中心比較表

韓國Personal Colour中心推薦

咩係Personal Colour(個人色彩)？

Personal Colour/個人色彩係一個色彩學理論，顧名思義就係最適合我哋膚色嘅顏色。由於每種顏色冷暖度、明度同飽和度等都唔一樣，透過用機器、色布等進行比較，觀察膚色有冇均勻咗、黑眼圈或者暗瘡印之類嘅色素有冇睇落深色咗、氣色有冇變好等等，就可以搵出可以配合返每個人皮膚、眼珠同髮色嘅色調，令成個人睇落更亮眼。

通常Personal Colour會先分為暖色系（Warm Tone）同冷色系（Cool Tone），之後再按照季節細分。韓國每間Personal Colour中心嘅分類方法都唔同，由4種色調到12、16種，甚至超過20種都有！最common嘅4色調分類分別係：

點解要做Personal Colour診斷？

#1 打造專屬形象同魅力

更加清楚自己適合啲咩之後，無論係穿搭打扮、化妝髮型等都可以upgrade，令你成個人睇落更有氣質同個人魅力，無論係去面試定去拍拖都可以俾到人一種好印象。

最重要係唔需要再盲目跟住潮流，知道最啱自己嘅形象之後個人自然會更有自信，由內到外散發光芒！

#2 可以慳返唔少冤枉錢

大家只要知道自己屬於邊種色調，就可以參考返最襯呢個Tone嘅顏色list，之後買化妝品同買衫都可以跟住揀，只要避開唔夾你嘅色，就唔會再發生「買咗返去又用唔著」嘅情況。

部分Personal Colour中心仲會提供推薦產品購物清單，大家做完之後可以即刻直接跟住去掃貨，以後買衫、買化妝品唔會再買錯色。

#3 一次過幫你襯好造型！

而家有好多Personal Colour中心都有提供埋體型同臉型分析，甚至有埋時裝指導，可以喺瞭解自己啱咩色之餘仲可以聽取專家意見，睇自己啱咩髮型髮色、咩版型嘅穿搭、咩飾物等等，事半功倍。

不過韓國Personal Colour中心越開越多，到底邊幾間出名、每間Personal Colour中心又有咩特色同優點？今日小編幫大家整理咗超過20間首爾同釜山必去嘅Personal Colour中心，幫大家分埋區，睇吓邊間啱你行程又符合你要求啦！

弘大Personal Colour中心推薦

弘大 | COLORGA SANDA_{(컬러가산다)}

• 地址：서울 마포구 양화로19길 22-8 B1F
• 交通：弘大入口站（홍대입구역）3號出口
• 翻譯語言：中文、英文、日文

位於弘大入口站附近嘅「COLORGA SANDA」係好多香港朋友嘅首選。除咗會幫你測Personal Colour，仲會推薦啱你嘅唇膏、髮色、飾物顏色等等，更加會幫你check你本身用緊嘅化妝品啱唔啱你，結果非常實用。

呢度另外仲有提供體型分析同妝髮體驗，透過測量各部位尺寸同搵出你嘅身材同臉部比例，推薦啱你嘅髮型同衫嘅版型。

[이미지 슬라이더]  
 

小編A嘅朋友上次去就一次過做咗Personal Colour分析同體型分析，填完問卷之後就會用色布進行比較，最神奇嘅係皮膚真係會因為顏色變化而變得更暗沉或者紅潤！最後測出小編朋友屬於Spring Pale色調，專業顧問會細心講解呢個色調嘅特徵，更加會推薦化妝品、飾物、髮色等等。

[이미지 슬라이더]     

然後就會進行體型分析，量度好胸圍、腰圍、臀圍、腳長等之後就會幫你計算比例，專業顧問同樣會講解相關體型特徵同注意事項。最正係現場直接有一個showroom，擺滿各種版型嘅衫，可以直接喺現場試著推薦穿搭，真眼望到分別！

更多資訊&預約詳情👇🏻

[스팟] COLORGA SANDA（弘大） | Personal Colour診斷

[스팟] COLORGA SANDA（弘大） | 體型分析

[스팟] COLORGA SANDA（弘大） | 韓式妝髮體驗

弘大 | COLOR OF YOU_{(컬러오브유)}

• 地址：서울 마포구 동교로 209 3F
• 交通：弘大入口站（홍대입구역）2號出口
• 翻譯語言：中文、英文、日文

「COLOR OF YOU」位於弘大入口站附近，地理位置夠曬方便！做完Test之後專業顧問就會叫大家show啲平時用開嘅化妝品俾佢睇，然後根據診斷結果推薦更加襯你嘅顏色俾你。顧問會再幫你寫份診斷書，入面寫齊曬你嘅Personal Colour、適合你嘅髮色、化妝品色同飾物顏色等等，成個過程有提及到嘅嘢幾乎都有寫低，大家可以返屋企慢慢參考！

[이미지 슬라이더]      

小編A之前去仲體驗咗佢哋嘅Personal Styling診斷，做之前會填份問卷，之後顧問就會針對唔同部位，例如頸部長度、肩寬、腰圍、盆骨、腿長、手、臉型等等幫你分析體型。小編最後被診斷為沙漏型，顧問仲會根據體型推薦你著咩衫會襯啲，雖然同平時小編著衫風格好唔同，但比較起上嚟版型的確比較襯！

更多資訊&預約詳情👇🏻

[스팟] COLOR OF YOU（弘大）

弘大/濟州 | image HO 個人色彩診斷_{(이미지호)}

弘大店

• 地址：서울 마포구 와우산로29길 54 4F
• 交通：弘大入口站（홍대입구역）7號出口
• 翻譯語言：中文、英文、日文

濟州店

• 地址：제주특별자치도 제주시 서문로 73 3F
• 交通：濟州國際機場轉乘巴士或的士
• 翻譯語言：中文、英文、日文

「image HO」喺弘大同濟州島都有分店，呢度最大特點係唔會只幫大家分最襯同最唔襯嘅色，反而係將顏色分成Best（最襯）、Second-best（第二襯）同Worst（最唔襯）三個級別，大家揀衫/化妝品嘅時候就可以更方便！

而且呢間專業個人色彩中心嘅顏色布更加攞咗專利，令客人可以更快更簡單咁睇清楚唔同顏色嘅分別，現場仲有賣自己研發出嘅Personal Colour診斷工具，等大家可以喺屋企都test到。

[이미지 슬라이더]    

小編A之前同朋友去，發現「image HO」嘅個人色彩診斷比起係專業顧問直接講個結果俾你知，反而會係俾你自己試吓搵出自己嘅色調，佢會慢慢引導你去分辨各種顏色，成個過程好好玩。分辨完最襯、第二襯、最唔襯嘅色之後，專家都會教你點好好運用呢幾款顏色。

另外如果係預約咗高級個人色彩診斷，色調分類會更仔細！大家仲可以揀有體型分析同包括化妝服務嘅選項，一次過做齊諮詢，改變形象！

更多資訊&預約詳情👇🏻

[스팟] image HO（弘大店） | Personal Colour體驗

[스팟] image HO（濟州店）

弘大/明洞/江南 | COCORY Color Inc._{(코코리색채연구소)}

延禧總店

• 地址：서울 서대문구 연희로 193-3
• 交通：新村站（신촌역）轉乘巴士
• 翻譯語言：中文、英文、日文

弘大店

• 地址：서울 마포구 홍익로 11 3F
• 交通：弘大入口站（홍대입구역）9號出口
• 翻譯語言：中文、英文、日文

明洞店

• 地址：서울 중구 명동10길 7-9
• 交通：明洞站（명동역）8號出口
• 翻譯語言：中文、英文、日文

江南店

• 地址：서울 강남구 강남대로158길 28 3F
• 交通：新沙站（신사역）8號出口
• 翻譯語言：中文、英文、日文

「COCORY Color Inc.」係一間規模都頗大嘅韓國Personal Colour中心，遊客必去嘅弘大、明洞、新沙都有分店，而且聽講會喺香港開班教學！佢哋除咗普通Personal Colour個人色彩診斷，仲有提供體型、化妝同時裝分析，想一次過做齊詳細分析、聽專家建議嘅話，推薦大家去「COCORY Color Inc.」！

[이미지 슬라이더]       

解釋完咩係Personal Colour同填完問卷之後，專業顧問會用「COCORY Color Inc.」自家研發嘅機器去測試皮膚明亮度、黃色&紅色比例，分辨到底你屬於Warm Tone定Cool Tone。然後就會用超多種顏色嘅布去比較，睇邊款最啱你。過程當中顧問勁快手，而且真係會睇得出分別！

最後會再整理一次結果，除咗自己本身屬於嘅色調之外，仲會俾埋其他襯你但係唔係best colour嘅顏色大家做參考。然後就會推薦髮色、配飾同化妝品色，亦都會以明星藝人做例子，向你推薦襯你嘅化妝風格。

[이미지 슬라이더]        

而另外加錢做嘅個人體型診斷入面會幫大家分析臉型、五官同體型，顧問會先量度身體同臉部五官大細，然後透過計算數字比例搵出你屬於邊種臉型，再推薦適合呢種臉型嘅髮型、眉型、眼鏡形狀、飾物等。小編朋友本身以為自己唔啱戴眼鏡，但係原來只係冇搵到啱嘅款式！

之後就會分析埋你啱咩pattern同版型嘅衫，以後要點襯衫，點買飾物都可以直接參考。

更多資訊&預約詳情👇🏻

[스팟] COCORY Color 延禧總店 | Personal Colour診斷

[스팟] COCORY Color 弘大店 | Personal Colour& 體型& 時裝分析 

[스팟] COCORY Color 明洞店 | Personal Colour& 體型& 時裝分析 

[스팟] COCORY Color 江南店 | Personal Colour& 體型& 時尚分析

弘大 | 朵姿 Does Studio_{(더즈 퍼스널컬러)}

• 地址：서울 마포구 포은로2가길 65 2F
• 交通：合井站（합정역）8號出口
• 翻譯語言：中文、英文、日文

[이미지 슬라이더]  

位於合井站附近嘅「朵姿 Does Studio」，無論係韓國本地人定偶像明星都會去做個人色彩診斷，專業度同信譽有保證！好多韓國Personal Colour中心都唔俾同行人士陪同入場，但呢度就可以自行帶翻譯人員(or朋友)，更加舒服同方便！

[이미지 슬라이더]     

小編B上次陪朋友去做咗個All-in-One診斷，入面包括個人色彩診斷、骨架/體型分析、時裝造型諮詢等項目，個半鐘就可以做到由頭到腳超詳細嘅形象諮詢！

首先會進行個人色彩診斷部分，專業顧問先用專業色彩儀器量度臉部膚色，當中除咗可以知道皮膚大約屬於咩色調，仲發現咗朋友額頭同下巴膚色唔均匀嘅問題，再提供相關建議，非常貼心。

之後就會好似平時做Personal Colour診斷咁，比較各種色布對膚色嘅影響，更加會詳細講解適合/唔適合嘅原因，而小編朋友就被診斷為Spring Pale色調！

[이미지 슬라이더]    

之後就會用透明卡分析臉部輪廓、五官、眉毛比例，仲會睇埋應該揀咩飾物、眼鏡，再比較埋各種花紋圖案、布料類型，做一個勁完整嘅造型諮詢。

[이미지 슬라이더]    

最後仲會量度肩闊、腰圍、臀圍同胸圍等，分析出體型種類之後就會進入試衫階段。現場有提供多種版型同材質嘅服裝，顧問會根據你嘅體型推薦你著邊幾種衫褲，對比前後差別都真係幾大。大家如果有啱心水嘅衫，仲可以直接買返屋企，小編都係第一次見有呢種服務嘅個人色彩中心！

更多資訊&預約詳情👇🏻

[스팟] 偶像御用個人色彩中心 | 朵姿 Does Studio（弘大合井）

弘大 | Vivid Hue_{(비비드휴)}

• 地址：서울 마포구 와우산로29길 66 2F
• 前往方法：弘大入口站（홍대입구역）8號出口
• 翻譯語言：中文、英文、日文

「Vivid Hue」首席顧問有美容設計專業背景，已進行超過5,000次個人色彩診斷，可以幫你精準分析最適合你嘅顏色同體型風格。無論係色調診斷，抑或係化妝品推薦、唇妝試色、飾品、衣服領口形狀同花紋都做得非常詳細！

更多資訊&預約詳情👇🏻

[스팟] Vivid Hue（弘大）

弘大 | VIVIDKANG 個人色彩診斷_{(비비드강 퍼스널컬러)}

• 地址：서울 마포구 양화로 193 4F
• 前往方法：弘大入口站（홍대입구역）3號出口
• 翻譯語言：中文、英文、日文

位於弘大嘅「VIVIDKANG 個人色彩診斷」同樣都有提供專業個人色彩診斷、體型分析。比起齋用色布進行比較，呢度仲會用一部機器先幫你test皮膚明亮度同色調，結果更可靠。

[이미지 슬라이더]      

因為「VIVIDKANG 個人色彩診斷」仲有韓式化妝option，所以上次小編C去嘅時候就一次過做埋！分別比較各種顏色嘅時候會見到五官同臉型根據顏色而出現變化，顧問話最襯自己嘅色會令五官同臉型睇落更加明確同自然，臉色都會紅潤啲。

之後就去到體驗韓式化妝嘅環節，大家可以帶啲平時會用嘅化妝品，專業顧問會幫大家睇到底啱唔啱你，再俾啲建議大家，下次去買化妝品就唔怕會中伏，小編C亦都藉今次機會搵到最啱自己嘅粉底同唇膏色號。最特別嘅係呢度會推薦埋香水，襯返你個形象，推薦鐘意化妝同香水嘅朋友們去弘大「VIVIDKANG 個人色彩診斷」體驗！

更多資訊&預約詳情👇🏻

[스팟] VIVIDKANG 個人色彩診斷（弘大）

聖水Personal Colour中心推薦

聖水 | DAMPPEUM個人色彩診斷_{(담쁨퍼스널컬러)}

• 地址：서울 성동구 아차산로 54 3F
• 前往方法：纛島站（뚝섬역）5號出口
• 翻譯語言：中文、英文、日文

2號線纛島站行5分鐘就會去到嘅「DAMPPEUM個人色彩診斷」有分基本同高級2個選項，揀高級選項可以同時體驗埋體型分析、風格分析等服務，之後買衫唔洗再十五十六，一眼就可以知自己啱咩style！

[이미지 슬라이더]      

小編A之前陪同事去嘅時候第一印象係專業顧問好親切友善，而且因為有中文翻譯，所以就算小編朋友聽唔明韓文都冇問題。顧問會幫忙分析髮色同膚色，然後再推薦啱你嘅粉底色號，亦會幫你check你個化妝袋入面嘅化妝品到底啱唔啱你。

其實小編A一直以為皮膚白啲就係Cool Tone、黃啲就係Warm Tone，但做完test之後發現原來唔係咁，而且每個人嘅結果真係可以好唔同！

[이미지 슬라이더]   

最後再做埋體型分析，顧問會根據你嘅頸部長度、肩寬、腰圍、盆骨、腿長等等幫你分析，仲會根據體型特徵推薦你做邊款運動改善體態，上身同下身啱著咩style、你嘅Personal Colour俾人咩印象、要點襯衫都會一次過話你知！

更多資訊&預約詳情👇🏻

[스팟] DAMPPEUM個人色彩診斷（聖水店）

聖水 | CCL色彩圖像融合研究所_{(CCL컬러이미지융합연구소)}

• 地址：서울 성동구 성수이로 66 7F
• 前往方法：聖水站（성수역）3號出口
• 翻譯語言：中文、英文、日文

聖水「CCL色彩圖像融合研究所」連續2年獲得韓國本地personal colour大獎，佢哋唔再係用普通嘅四季色調理論，反而會結合更加科學同客觀嘅方法為你搵出最襯你嘅顏色。而且專業顧問會根據你嘅膚色、臉型、膚況等推薦Best Colour同 Second Best Colour俾你。

[이미지 슬라이더]        

小編D之前都已經做過Personal Colour診斷，所以本來以為會同其他中心差唔多，但發現原來「CCL色彩圖像融合研究所」嘅分析更加詳細！當時專業顧問話宏觀啲嚟睇小編屬於Spring Warm Tone，不過原來仲可以根據佢哋嘅自家理論再細分，而且仲會幫手搵出Best Colour、Second Best Colour同Worst Colour，比起其他個人色彩中心更仔細。

因為本身都想學化妝，小編D有順便報埋化妝班。化妝師會一路講解，跟住喺你其中一邊臉分開幾個部位示範俾你睇，然後再到你親自喺另一邊臉試化妝，可能因為可以自己落手，所以記憶會比較深刻。而且會用返頭先做Personal Colour Test嘅時候嘅推薦product，自己化完之後化妝師會再同你講有咩需要改進，超細心。

更多資訊&預約詳情👇🏻

[스팟] CCL色彩圖像融合研究所（聖水）

聖水 | ColorLover_(컬러버)

• 地址：서울 성동구 성수이로 51 1차 1302호
• 前往方法：聖水站（성수역）3號出口
• 翻譯語言：中文、英文、日文

「ColorLover」係一間獲得韓國專利廳、中小企業部同Google認證嘅專業Personal Colour診斷中心，以科學同系統化診斷系統為基礎，提供準確又可靠嘅個人色彩結果。自家開發嘅應用程式更加全球累積超過420萬次下載，好多人都用過覺得滿意！

因為已經有好多人去過呢間中心做個人色彩診斷，現場專業顧問全部都經驗豐富，如果想體驗系統化服務，同時參加埋化妝班，非常推薦大家去「ColorLover」！

更多資訊&預約詳情👇🏻

[스팟] ColorLover（聖水）

江南必去Personal Colour中心

狎鷗亭 | my:shopper_{(마이쇼퍼)}

• 地址：서울 강남구 언주로153길 10-6
• 交通：狎鷗亭站（압구정역）3號出口
• 翻譯語言：廣東話、普通話、英文、日文、法文、阿拉伯文

要喺韓國搵到有廣東話翻譯嘅Personal Colour中心真係唔易！呢間「my:shopper」上過好多韓國電視節目，而且仲有好多明星都嚟做過診斷，例如MONSTA X同Running Man都有喺度拍過節目，喺韓國係數一數二出名嘅Personal Colour中心！

[이미지 슬라이더]       

小編E之前去咗做Personal Colour診斷同韓妝體驗，覺得比較特別嘅係呢度仲會幫你睇你啱亮面定霧面、金色定銀色，仲會比較各種花紋，非常仔細。冇諗過同樣係格仔紋，大格仔同細格仔感覺完全唔同！

專業顧問幫你check完化妝品之後，亦都會另外推薦幾款化妝品、穿搭、髮色同飾物俾大家，試完滿意可以直接影低去買，成個體驗結束之後都會send個完整file俾你，之後去行街shopping都可以參考。

[이미지 슬라이더]     

而韓妝體驗亦都唔馬虎，同普通去明星妝髮Studio差唔多。優點係會直接根據你嘅Personal Colour診斷結果，用推薦過嘅化妝品進行，大家可以從中偷師！

更多資訊&預約詳情👇🏻

[스팟] my:shopper（狎鷗亭店）

[스팟] my:D Makeup（狎鷗亭）

九老 | Dustmoth Stography_{(먼지나방)}

• 地址：서울 구로구 디지털로26길 111 4F 408,409호
• 前往方法：九老數碼園區站（구로디지털단지역）2號出口
• 翻譯語言：英文

喺韓國大名鼎鼎嘅「Dustmoth Stography」由2013年開始提供Personal Colour診斷，擁有超過10年經驗，更加提供Personal Colour診斷、化妝同拍攝一條龍服務，啱曬時間緊迫又想做起咁多種體驗嘅你！

診斷會由用專業儀器量度皮膚色調開始，用數據清楚瞭解自己皮膚嘅紅調、黃調、明亮度等等。然後再用色布不斷比較顏色，搵出自己屬於邊一個色調。專業顧問都非常親切，內容都非常易明。

根據所選項目，仲可以試粉底同彩妝產品，或者瞭解自己嘅最佳髮色同飾物顏色。最後會收到一份屬於自己類型嘅顏色卡，方便你記住自己嘅Personal Colour。上面整理咗啱你嘅顏色，專家仲會俾唔少小貼士同資料你，揀衫或者買化妝品時可以直接參考！

更多資訊&預約詳情👇🏻

[스팟] Dustmoth Stography | Personal Colour診斷

[스팟] Dustmoth Stography | 專業拍攝

狎鷗亭/釜山 | 韓國時尚心理研究院_{(한국패션심리연구소)}

清潭總店

• 地址：서울 강남구 선릉로 840 4F
• 前往方法：狎鷗亭羅德奧站（압구정로데오역）4號出口
• 翻譯語言：中文、英文

釜山店

• 地點：부산 수영구 남천바다로10번길 19 2F
• 前往方法：金蓮山站（금련산역）5號出口
• 翻譯語言：中文、英文、日文

[이미지 슬라이더]  
 

「韓國時尚心理研究院」總店位於狎鷗亭羅德奧，仲有一間分店喺釜山，呢間中心規模大，有各種專利之餘仲攞過唔少獎，唔少韓國人氣明星同運動選手都有嚟過做Personal Colour診斷。除咗可以知道自己屬於咩tone，仲有機會俾專家幫你化返個韓式日常妝！

[이미지 슬라이더]      

小編F之前去清潭總店做咗次個人色彩診斷，開始前會先用一部專業儀器量度皮膚明亮度、黃色調同紅色調嘅準確數據，之後再透過用一系列嘅顔色卡仔，同自己嘅皮膚、頭髮同眼珠顔色比較之後搵出準確顏色。

Check完色調之後會直接比較最襯同最唔襯嘅顏色，齋睇相就知道真係差好遠！之後顧問仲會教應該要點襯衫同推薦飾物顏色、髮色、香水等。而小編覺得最實用嘅係可以直接搽粉底上臉睇效果，小編平時用開嘅粉底太白，但係又搵唔到啱嘅顔色，不過好彩有專家推薦，終於俾小編搵到最啱自己嘅粉底色號！

[이미지 슬라이더]   

呢間江南Personal Colour中心亦都有提供化妝服務，專業化妝師會用返頭先推薦過嘅product去化，如果有其他滿意嘅產品話，建議大家可以問化妝師用咗咩色號，化妝師都會一一解答大家嘅問題，之後自己化妝就可以跟住用啦！

更多資訊&預約詳情👇🏻

[스팟] 韓國時尚心理研究院（清潭總店） | Personal Colour診斷

[스팟] 韓國時尚心理研究院（清潭總店） | 化妝體驗&化妝班

[스팟] 韓國時尚心理研究院（釜山店）

江南 | Chaeha Beautywith Personal Color_{(채하 뷰티위드 퍼스널컬러)}

• 地址：서울 서초구 서초대로73길 40 1005호
• 前往方法：新論峴站（신논현역）7號出口
• 翻譯語言：中文、英文、日文

如果想直接向專業化妝師學化妝同時做埋Personal Colour診斷，大家可以考慮去「Chaeha Beautywith Personal Color」。預約包含化妝諮詢嘅項目嘅話，可以跟現職化妝師學超多實用化妝技巧！

[이미지 슬라이더]   

上次去做個人色彩診斷嘅小編G話本身以為膚色偏深就會係暖色調，但點知成個診斷過程同結果都話佢係Cool Tone！測試完之後仲可以試唇膏，平時好多個人色彩中心為咗保持衛生，都只可以搽上手，但呢度會提供即棄唇掃俾你直接搽上嘴，效果更明顯！

[이미지 슬라이더]   

而最令人期待嘅化妝諮詢方面，雖然唔會即場幫你化全妝，但會話你知你啱用嘅色系同化妝手法，仲有即學即用嘅化妝小貼士，亦會幫你check平時用開嘅化妝品，對於想學化妝但咩都唔識嘅新手嚟講非常有用。

更多資訊&預約詳情👇🏻

[스팟] Chaeha Beautywith Personal Color（江南店）

江南 | All Beauty Studio_{(올뷰티 스튜디오)}

• 地址：서울 서초구 남부순환로364길 7-6
• 交通：良才站（양재역）5號出口
• 翻譯語言：英文

位於江南嘅「All Beauty Studio」由有30年經驗同有日本ICPA執照嘅院長親自為每位客人進行個人色彩、臉型診斷、骨架分析、化妝指導一條龍諮詢服務，透過分析顧客臉型、五官比例、膚色、體型等，提供最自然又有說服力嘅形象建議。

[이미지 슬라이더]     

江南「All Beauty Studio」其中一個特點係有一塊大落地窗，採光充足，診斷結果更準確同穩定！同其他個人色彩中心一樣，呢度同樣需要先填一份問卷，等顧問可以瞭解你嘅生活作息、鐘意嘅色調同風格等等。再透過圍繞色彩嘅明度同飽和度去分析同建議你點好好善用配色。

之後就會進行骨架同臉型分析，逐一檢視身體比例同特徵，再用韓國明星做例子，解釋應該要點樣取長補短，用咩方法去凸顯體型優點。小編最buy呢度嘅一點係專業顧問唔止會提供分析結果，仲會結合職業、生活方式同價值觀等因素，推薦可以即刻套用於日常生活同各種情境嘅形象方向。

更多資訊&預約詳情👇🏻

[스팟] 個人色彩&形象顧問 | All Beauty Studio（江南）

江南 | Warm N Cool 個人色彩診斷_{(웜앤쿨 퍼스널컬러진단)}

• 地址：서울 서초구 사평대로 353 2F 205호
• 交通：新論峴站（신논현역）1號出口
• 翻譯語言：中文、英文、日文

被譽為韓國始祖級Personal Colour中心，「Warm N Cool」憑住無數客人嘅口碑同光顧，建立高度信譽，而且院長自己一個人就幫過超過35,000人進行診斷，加上色彩學專業背景，能夠提供更準確同客觀嘅諮詢服務！

呢度唔單止簡單分暖同冷色調，仲會利用自家開發嘅16分類系統、超過300款診斷布同測色儀等工具，為顧客帶來客觀又科學化嘅診斷結果！

[이미지 슬라이더]  
 

小編H話之前都有聽過呢間Personal Colour中心，去之前非常期待，而做完之後真係冇失望，成個診斷過程同報告都勁仔細！首先因為呢度會用自家開發嘅色調分類系統，而且仲會配合測色儀，結果相對上更客觀。

另外「Warm N Cool」專業顧問經驗豐富，無論係用色布測試時會睇下膚色係咪顯得暗啞定有精神，仲會分析下法令紋或者黑眼圈有冇特別突出，更加會提供好多實用貼士等大家可以直接應用於日常生活。

[이미지 슬라이더]       

而進行體型診斷嘅時候唔單止會量度各部位長度大小，仲會逐一摸清楚骨架同手骨，了解基本體型底子。除此之外呢度仲有臉型診斷，根據診斷結果推薦髮型、領口剪裁、飾物、眼鏡款式，仲可以親自試戴，體驗下邊啲風格啱自己。有興趣嘅話仲可以預約化妝體驗，用最啱你嘅化妝品化返個韓妝。

更多資訊&預約詳情👇🏻

[스팟] Warm N Cool 個人色彩診斷（江南總店）

江南 | Color Signal_{(컬러시그널)}

• 地址：서울 강남구 신사동 523-10 4F
• 前往方法：新沙站（신사역）8號出口
• 翻譯語言：中文、英文

「Color Signal」嘅專家團隊由專業Personal Colour導師同化妝師組成經驗豐富，結果準繩度有保證！呢度設有超過500款美妝產品，大家可以親自試用，搵出最啱自己嘅顏色同product，唔少韓國IDOL演員同YouTuber都有嚟做過Personal Colour！

[이미지 슬라이더]       

小編之前陪朋友去，一入門口就會見到放滿化妝品嘅化妝台，全部都根據色調分類，睇到就會好期待知道自己到底屬於咩色調，啱用咩產品。

診斷順序同樣係由填寫問卷同介紹個人色彩理論開始，然後先檢查用緊嘅唇彩、曾經染過嘅髮色、目前髮色狀態等等，再正式用色布進行比較，搵出專屬色調。

[이미지 슬라이더]     

如果揀包化妝嘅選項，化妝師會按照Personal Colour診斷結果、風格同客人喜好進行，大家仲可以趁機問化妝師有關化妝嘅問題，對於平時覺得自己化妝怪怪地，或者想學化妝嘅朋友們嚟講係一個大好機會！

更多資訊&預約詳情👇🏻

[스팟] Color Signal（江南） | Personal Colour診斷

[스팟] Color Signal（江南） | 化妝體驗&化妝班

新沙/汝矣島 | ocollor_{(오콜로르)}

新沙店

• 地址：서울 강남구 강남대로156길 20 2F
• 前往方法：新沙站（신사역）8號出口
• 翻譯語言：中文、英文、日文

汝矣島店

• 地址：서울 영등포구 국제금융로6길 33 11F 1106호
• 前往方法：汝矣島站（여의도역）5號出口
• 翻譯語言：中文、英文、日文

「ocollor」已經開咗15年，專家經驗超豐富，而且設備同道具都好齊全。如果大家會揀去呢間Personal Colour中心體驗，記住要做埋Personal Fit體型分析，因為佢哋會運用獲得專利嘅獨家體型計算機，以科學角度分析體型之後教你點放大優點、彌補缺點，再根據生活習慣提供多樣化指導。

[이미지 슬라이더]     

早前小編I就慕名去咗「ocollor」汝矣島店體驗，做完基本Personal Colour診斷之後，專業顧問就幫小編量度手、腳、膊頭長度同胸圍、腰圍、臀圍，然後透過獨家計算方法分析到底屬於邊種體型，然後再話俾大家知著衫嘅時候需要注意啲咩，仲會幫大家分析埋臉型。

最後聽顧問分析，原來每個色調都有幾個可以聯想起嘅形容詞，小編個人覺得同自己都幾夾。佢仲會教要點襯色、揀咩版型嘅衫、眼鏡、帽等等，無論係買衫/化妝品定染頭髮前都可以參考。如果有預約埋化妝體驗，仲可以化返個襯返你形象嘅日常妝，之後繼續去玩！

更多資訊&預約詳情👇🏻

[스팟] ocollor個人色彩診斷（新沙店）

[스팟] ocollor個人色彩診斷（汝矣島店）

明洞必去Personal Colour中心

明洞 | The Bom個人色彩診斷_{(더봄 퍼스널컬러)}

• 地址：서울 중구 퇴계로18길 7 107호
• 前往方法：明洞站（명동역）3號出口
• 翻譯語言：中文、英文、日文

「The Bom個人色彩診斷」係一間明洞大街附近嘅Personal Colour中心，全部道具同設備都好新淨！過程當中唔止Personal Colour，仲有韓式化妝體驗，可以直接喺度等專家幫你化返個靚妝。

[이미지 슬라이더]   
  

小編朋友幾年前去過一次「The Bom個人色彩診斷」做Personal Colour Test，當時去本身以為得普通話同英文翻譯，但點知最後發現翻譯姐姐識講廣東話（不過佢話唔係日日都會喺度）！可能係因為咁，所以成個診斷過程都非常順暢，而且有咩唔明都可以直接問。

專業顧問除咗會搵出你嘅個人色調，更加會幫你揀埋Best Colour同Worst Colour。佢話就算係Worst Colour，都可以用唔同方式去活用，打破咗大眾對Worst Colour嘅偏見！之後顧問會再推薦化妝品，大家可以影低之後直接去明洞Olive Young掃貨，非常方便。

更多資訊&預約詳情👇🏻

[스팟] The Bom個人色彩診斷（明洞） | Personal Colour診斷

[스팟] The Bom個人色彩診斷（明洞店） | 化妝體驗

明洞 | COLORIZE_{(컬러라이즈)}

• 地址：서울 중구 퇴계로 145
• 前往方法：明洞站（명동역）9號出口
• 翻譯語言：中文、英文、日文

「COLORIZE」係一間喺明洞好出名嘅Personal Colour&體型診斷中心，中心入面設有特殊燈光，令分析過程更精細、結果更準確。而且仲有提供一個self make up zone，可以直接試各種化妝品、眼鏡同飾物，試啱影低再去買就得，夠曬方便。

[이미지 슬라이더]         

小編J之前去嘅時候話現場裝修唔似係個人色彩中心，反而係似Pop-up store，有好大打卡位俾大家扮靚靚之後影相留念。另一個小編覺得呢度同普通個人色彩中心唔同嘅位係，呢度仲有提供香水DIY體驗，大家可以根據自己Personal Colour嘅形象去整返支香水，實用得嚟又有紀念價值。

更多資訊&預約詳情👇🏻

[스팟] COLORIZE（明洞總店）

明洞 | COLOR HOLIC_{(컬러홀릭)}

• 地址：서울 중구 삼일대로 301 2F
• 前往方法：明洞站（명동역）10號出口
• 翻譯語言：中文、英文、日文

明洞「COLOR HOLIC」代表院長擁有時裝相關學歷同弘益大學研究所色彩專業背景，更累積15年電影服裝設計同演員造型經驗，大家去到可以體驗到明星級Personal Colour同形象諮詢！

[이미지 슬라이더]       

小編之前帶過外國人朋友去「COLOR HOLIC」做個人色彩診斷、體型分析同化妝體驗，因為呢度所有諮詢室都係獨立房，所以會冇咁尷尬，亦都可以輕鬆問問題。解釋完基本理論之後就進行咗色彩診斷，專業顧問仲會建議點樣去運用唔襯自己嘅顏色，更加會推薦埋Gel甲、髮色、飾物顏色等，非常仔細。

體型分析方面，比起普通用捲尺度，顧問會透過實際觸摸去確認骨架大細同厚度，然後教點用造型、剪裁同物料去修飾缺點。最後仲會根據你嘅風格同個人色彩幫你化妝，塑造最適合你嘅形象。推薦想一次過進行個人色彩、體型、化妝診斷嘅朋友們嚟體驗！

更多資訊&預約詳情👇🏻

[스팟] 個人色彩分析&造型一條龍服務 | COLOR HOLIC（明洞店）

首爾其他地區必去Personal Colour中心

乙支路 | My Color Lab_{(마이컬러랩)}

• 地址：서울 중구 남대문로10길 28 6F 603호
• 前往方法：乙支路入口站（을지로입구역）3號出口
• 翻譯語言：英文

「My Color Lab」位於首爾站附近，交通非常方便。而且幫大家做診斷嘅專家曾經喺弘益大學攻讀設計博士學位，更加獲得專業調色師執照，實力無容置疑！

[이미지 슬라이더]      

小編K因為本身唔太會化妝或者打扮，所以一直都唔知自己襯咩色。而佢之前去完「My Color Lab」做「進階個人色彩診斷」之後形象都有個幾大嘅轉變！

去到之後會先睇皮膚色調、瞳孔顔色同髮色，然後就check係Warm Tone定Cool Tone，顧問嘅講解非常詳細，就算本身對顏色唔太敏感都可以理解到。呢度仲事先會準備好幾種唔同顏色嘅耳環同頸鏈等等俾大家試戴，其實小編K平時唔會戴耳環同頸鏈，不過顧問居然話佢好啱戴，之後返工就見到佢多咗條頸鏈XD 證明其實Personal Colour診斷真係可以令一個人更瞭解自己！

更多資訊&預約詳情👇🏻

[스팟] My Color Lab（乙支路）

市廳 | COLOR LUME_(컬러룸)

• 地址：서울 중구 서소문로 111 5F 501호
• 前往方法：市廳站（시청역）10號出口
• 翻譯語言：英文

「COLOR LUME」最特別嘅係只會提供1人Personal Colour測試，夠曬有私隱之餘全個時段都只會集中幫你分析，得出嘅結果都會更加詳盡。做完分析之後專家仲會俾份推薦購物清單你，買化妝品嘅時候可以直接對住買，夠曬方便！

更多資訊&預約詳情👇🏻

[스팟] COLOR LUME（市廳站）

景福宮 | Another 29_{(어나더29)}

• 地址：서울 종로구 필운대로2길 14
• 前往方法：景福宮站（경복궁역）2號出口
• 翻譯語言：中文、英文、日文

「Another 29」位於景福宮附近，提供專業Personal Colour診斷服務同化妝班，等大家可以運用診斷結果揀啱自己嘅化妝產品同手法，一舉兩得！

[이미지 슬라이더]     

比較唔同嘅係呢度除咗色調之外，亦都會幫你睇你適合邊種pattern，買衫嘅時候會更方便。顧問亦都會講解俾大家聽平時化妝有咩需要注意，或者可以突出邊啲位等等，大家以後自己化妝嘅時候都可以活學活用。

更多資訊&預約詳情👇🏻

做Personal Colour前小貼士

呢幾年小編團隊都有去過唔少Personal Colour中心體驗，發現以下呢幾樣嘢係無論去邊間做個人色彩診斷都應該要注意，大家記住去體驗之前要參考定！

1. 事先執定自己平時用開嘅化妝品

好多韓國Personal Colour中心都有提供化妝品檢查服務，專業顧問主要會睇你用開嘅粉底、眼影、唇膏等等嘅色號符唔符合你嘅個人色彩，然後再為你推薦產品。所以去之前記住執定個化妝袋，咁就可以聽到更實用嘅建議啦！

2. 建議要素顏去

因為Personal Colour診斷係base on你最原始嘅膚色進行，所以要用素顔進行。雖然部分個人色彩中心會提供卸妝嘅地方，但大部分都唔會有卸妝產品，所以建議直接素顔去！

3. 診斷前要除低所有飾物/眼鏡

飾物同眼鏡都會影響到Personal Colour診斷結果，所以建議視力較差人士可以戴透明隱形眼鏡。但如果平時會一直佩戴眼鏡，亦都可以戴住眼鏡進行診斷。

4. 問卷答案要寫得更詳細

幾乎所有Personal Colour診斷開始前都要先寫一份問卷，專家會根據呢張問卷幫大家分析，問卷答案寫得越詳細，專家就可以更加有效咁幫大家進行診斷！

5. 進行體型分析時建議著貼身衫

因為體型分析主要需要量度各個身體部位嘅大小同闊度，然後診斷出你屬於咩體型，如果著比較寬鬆或者厚嘅衫就會影響到效果，而且會睇唔出到底真實比例係點。

做完Personal Colour之後唔可以錯過...

韓式形象照

韓國而家真係好興去影彩色背景嘅證件相同個人形象照，唔再只係得平時嘅白色、藍色、粉紅色底！

就好似好多香港朋友們都有預約去影嘅Sihyunhada會透過詳細諮詢，瞭解個人風格同特色再進行拍攝。如果呢個時候大家知道自己係咩色調，就可以揀返最襯自己嘅背景顏色，影返張獨一無二嘅形象照。做完Personal Colour之後記住預約埋韓式妝髮服務同證件相/形象照拍攝體驗，留低你最靚嘅moment！

韓式染髮

知道自己係咩色調之後，就當然要染返個最襯自己嘅髮色啦！上述介紹過嘅Personal Colour中心都會喺過程當中向你推薦髮色（甚至係髮型），大家可以攞住個結果去韓國髮型屋，體驗高質韓國美髮同時轉個新形象！想知道首爾邊幾間髮型屋最出名染頭髮？快啲睇下面呢篇文章啦：

[블로그] 2026年首爾必去染髮Salon推薦

韓國Personal Colour常見問題FAQ

Q1. 翻譯服務係Personal Colour中心提供定要自己安排？

A：而家好多韓國Personal Colour中心都會有專業翻譯駐場，或者顧問可以直接用英文溝通，所以唔需要自己安排翻譯人員！預約之前建議參考上述介紹，睇清楚想去嗰間Personal Colour中心會提供咩語言嘅翻譯服務。

Q2. 喺韓國做Personal Colour診斷平均價錢係幾多？

A：視乎你所揀嘅診斷包括咩項目，通常1:1診斷平均₩100,000~150,000(100000-150000)不等，如果你同朋友一齊做1:2甚至係1:3診斷，價錢會平啲。

Q3. Personal Colour診斷成個過程要幾耐？

A：1:1診斷通常要1-1.5小時左右，如果同朋友一齊做，就要大約2小時，安排行程嗰陣記得預留返足夠時間。

Q4. 點樣預約Personal Colour診斷體驗？

A：多數Personal Colour中心都可以透過Instagram DM或者WhatsApp預約，但如果唔識韓文，又唔想咁麻煩，可以直接透過Creatrip用繁體中文同港幣預約，去到現場就唔洗另外再俾錢！

Q5. 可唔可以同朋友一齊做Personal Colour診斷？

A：可以！上述介紹嘅鋪頭幾乎都有提供1:2或者1:3嘅小組診斷選項，同朋友一齊做可以互相睇之餘，安排行程嘅時候都會更方便！

Q6. 做Personal Colour診斷可唔可以戴隱形眼鏡或者Color Con？

A：進行個人色彩診斷嘅時候最重要係保持最自然嘅狀態，而且因為要觀察眼珠色調，所以係唔可以戴Color Con 嘅，如果有近視建議戴透明隱形眼鏡。

Q7. 會唔會提供個人色彩診斷中文或者英文報告？

A：呢篇文章入面介紹嘅Personl Colour中心都會提供中文或者英文分析報告，有啲仲會寄PDF俾你，方便你之後去行街買嘢嗰陣隨時拎出嚟參考。

以上就係小編幫大家整理出2026年最推薦嘅Personal Colour中心同相關服務，有興趣嘅朋友們記住下次嚟韓國之前要book定啦！

如果你對文章內容有咩意見或者想查詢更多資訊，可以隨時喺留言區留言，亦可以透過WhatsApp(+82 10-8818-2915、英文服務)或LINE(@creatrip；中/日文服務)聯絡Creatrip 24小時客戶服務中心，亦歡迎透過電郵(help@creatrip.com)來信諮詢。想知更多韓國最新資訊，記住follow埋我哋嘅Instagram同Threads啦！